ქართული კინოს ტრიუმფი პეკინის კინოფესტივალზე

 

ქართველი კინემატოგრაფისტების მონაწილეობა პეკინის საერთაშორისო კინოფესტივალზე ტრადიციულად დიდი გამარჯვებით დასრულდა. დაჯილდოვების ცერემონიალს 250 მილიონი მაყურებელი ადევნებდა თვალს. შარშანდელის მსგავსად, წელსაც 10 ჯილდოდან ქართულ ფილმებს 4 მთავარი პრიზი გადაეცათ:

• Tiantan Award საუკეთესო სრულმეტრაჟიანი ფილმისთვის ანა ურუშაძემ მოიპოვა და მას ეს ჯილდო თავად კინოფესტივალის ჟიურის პრეზიდენტმა ვონგ კარ ვაიმ გადასცა;
• Tiantan Award საუკეთესო რეჟისურისთვის მარიამ ხაჭვანს ერგო;
• Tiantan Award საუკეთესო მსახიობი ქალისთვის ნატო მურვანიძეს მიანიჭეს ფილმისთვის "საშიში დედა". მსახიობი პეკინში არ იმყოფებოდა და მის მაგივრად ეს პრესტიჟული ჯილდო ცნობილმა მსახიობმა იზაბელ იუპერმა ფილმის რეჟისორს - ანა ურუშაძეს გადასცა;
• Tiantan Award საუკეთესო ოპერატორული ნამუშევრისთვის მინდია ესაძემ მოიპოვა ფილმისთვის "დედე";

👉  კვალიფიციური მომზადება - ყველა საგანი ერთ სივრცეში 

აღსანიშნავია, რომ კინოფესტივალის საერთაშორისო ჟიურის შემადგენლობაში იყვნენ:

• ჟიურის პრეზიდენტი Wong Kar Wai - კანის კინოფესტივალის არაერთგზის პრიზიორი და პირველი აზიელი რეჟისორი, რომელიც ამავე ფესტივალის ჟიურის წევრი გახდა. აღსანიშნავია, რომ Wong Kar Wai ბერლინის 63-ე კინოფესტივალის ჟიურის პრეზიდენტიც იყო;
• DUAN Yihong - პირველი ჩინელი მსახიობი, რომელმაც მსოფლიოს სხვადასხვა ა-კლასის კინოფესტივალზე საუკეთესო მამაკაცი მსახიობის ჯილდოს მოპოვება შეძლო;
• Jan A.P. KACZMAREK - ოსკარის მფლობელი და ოქროს გლობუსის ნომინანტი კომპოზიტორი;
• Jonathan MOSTOW - ცნობილი ამერიკელი რეჟისორი და პროდიუსერი, რომლის შემოქმედებაც ისეთ ფილმებს აერთიანებს, როგორებიცაა: Terminator 3: Rise of the Machines (2003), the WWII submarine thriller U-571 (2000), The Game (1997), Hancock (2008), Playing for Keeps (2012);
• Călin Peter NETZER - რუმინელი რეჟისორი, ბერლინის საერთაშორისო კინოფესტივალის ოქროს (2013) და ვერცხლის (2017) დათვების მფლობელი;
• Ruben ÖSTLUND - შვედი რეჟისორი, რომელმაც მსოფლიო აღიარება მისი ბოლო ნამუშევრით The Square (2017) მოიპოვა. ფილმის დისტრიბუცია 70 ქვეყანაში განხორციელდა, მოიპოვა "ოქროს პალმის რტო" კანის საერთაშორისო კინოფესტივალზე და ოსკარისა და ოქროს გლობუსის ნომინაციები;
• SHU Qi - ცნობილი ჩინელი მსახიობი, "ოქროს დათვის" ნომინანტი ბერლინის საერთაშორისო კინოფესტივალზე, ბერლინისა და კანის კინოფესტივალების ჟიურის წევრი. მისი მონაწილეობით გამოსულმა ბოლო ფილმმა The Lost Legend გამოსვლიდან მეცხრე დღეს 1 ბილიონი იუანი (158,818,400 $) შემოსავალი მოიტანა;

ახალგაზრდა ასაკის მიუხედავად (ფესტივალი 2011 წელს დაარსდა) პეკინის საერთაშორისო კინოფესტივალი მნიშვნელოვანი კინოღონისძიებაა, რომელმაც უკვე შეძლო სახელის მოპოვება და ყოველწლიურად ჩინური კინოინდუსტრიის წარმომადგენლების გარდა მას ჰოლივუდის რეჟისორები, მსახიობები და პროდიუსერები ესწრებიან.

💢 კავკასიის საერთაშორისო უნივერსიტეტი

საქართველო პეკინის საერთაშორსო კინოფესტივალთან დაარსების დღიდან თანამშრომლობს და იგი ფესტივალზე -ყოველთვის ღირსეულად იყო წარმოდგენილი. შარშან კი ქართველმა კინემატოგრაფისტებმა, ისევე როგორც წელს, პეკინში 10 მთავარი ჯილდოდან 4 მოიპოვეს: კინოფესტივალის საუკეთესო მხატვრული ფილმი გიორგი ბარაბაძის "ლუკა" გახდა. ამავე ფილმში ქალის მეორეხარისხოვანი როლის საუკეთესო შესრულებისთვის კი ლია კაპანაძე დააჯილდოვეს.ფილმს "სხვისი სახლი" ასევე 2 პრიზი ხვდა წილად - საუკეთესო რეჟისურისთვის და საუკეთესო ოპერატორული ნამუშევრისთვის. რუსუდან გლურჯიძეს ჯილდო ცნობილმა ფრანგმა მსახიობმა ჟან რენომ გადასცა, რომელიც 2017 წელს პეკინის კინოფესტივალის საერთაშორისო ჟიურის წევრი იყო.

gnfc.ge