გრიგოლ ვაშაძე სასამართლოში გამოკითხეს

თბილისის საქალაქო სასამართლოში „ნაციონალური მოძრაობის“ ოპოზიციური გაერთიანების ლიდერის, გრიგოლ ვაშაძის მაგისტრატი მოსამართლის თანდასწრებით, მოწმის სტატუსით გამოკითხვა დასრულდა. 

👉  კვალიფიციური მომზადება - ყველა საგანი ერთ სივრცეში

გრიგოლ ვაშაძე სამართალდამცველების შეკითხვებს 20-21 ივნისს პარლამენტის წინ განვითარებულ მოვლენებთან დაკავშირებით უპასუხა.

„ყველაფერი იყო კორექტულად-ბრალდების მხარე ყველანაირად ცდილობდა, რომ საქმე წაეყვანა იმ მიმართულებით, რომ იყო თუ არა რამე მცდელობა, რომ პიროვნებების რომელიმე ჯგუფს მოელაპარაკა სახელმწიფო გადატრიალების მცდელობაზე. ჩემი პასუხი იყო, რომ ასეთი იმპროვიზირებული არაფერი მინახავს ცხოვრებაში, როგორც 20 ივნისს შემდგარი მანიფესტაცია იყო.

მოქალაქეები ერთმანეთს ჯერ კიდევ დღის 12:00 საათზე სოციალური ქსელებით მოელაპარაკნენ და ნურც ერთი ოპოზიციური პარტია ნუ ეცდება, რომ ორგანიზატორები იყვნენ. ორგანიზატორები იყვნენ საქართველოს მოქალაქეები-სახელმწიფო გადატრიალება არ მინახავს ისეთი, რომელსაც ნორმალური ხმის აპარატურაც კი არ აქვს. ყველა იქ მოფ ჟურნალისტს შეუძლია, დამემოწმება, რომ მეხუთე-მეექვსე რიგის იქეთ არავის ესმოდა, რა ხდებოდა. ასე რომ, ხელისუფლების მცდელობა, განწირულია წარუმატებლობისთვის“, - განუცხადა ვაშაძემ ჟურნალისტებს.  

შინაგან საქმეთა სამინისტროში მიმდინარე გამოძიების ფარგლებში, რომელიც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს, გრიგოლ ვაშაძე სამინისტროში გამოკითხვაზე იყო დაბარებული, რაზეც მან უარი განაცხადა. ვაშაძის გადაწყვეტილებით, 20-21 ივნისს მოვლენებზე ინფორმაციას გამომძიებლებს მხოლოდ მაგისტრი მოსამართლის თანდასწრებით მიაწვდის.

უწყების განცხადებით, შინაგან საქმეთა სამინისტროში ინტენსიურ რეჟიმში გრძელდება სხვადასხვა საგამოძიებო და საპროცესო ღონისძიებები 20-21 ივნისს პარლამენტის წინ განვითარებულ მოვლენებთან დაკავშირებით. დანაშაულში მონაწილე პირების იდენტიფიცირებისათვის მიმდინარეობს შესაბამისი მტკიცებულებების მოპოვება, მოწმეებისა და თვითმხილველების გამოკითხვა.

მაგისტრატი მოსამართლის თანდასწრებით „ეროვნულ-დემოკრატიული პარტიის“ ლიდერი ბაჩუკი ქარდავა, გიორგი ბარამიძე, გიგი უგულავა, ხატია დეკანოიძე და გუბაზ სანიკიძეც გამოკითხეს.  

20 ივნისს საღამოს პარლამენტთან მშვიდობიანი აქციის შემდეგ, მომიტინგეების ნაწილმა შენობაში შეჭრა სცადა. სპეცრაზმმა აქციის დასაშლელად რამდენჯერმე გამოიყენა ცრემლმდენი გაზი, წყლის ჭავლი და რეზინის ტყვიები. შედეგად სასწრაფო დახმარების ჯგუფებმა საავადმყოფოში 240 ადამიანი გადაიყვანეს, მათგან 80 სამართალდამცველი იყო, რეზინის ტყვიებისგან დაშავდა მედიის 38 წარმომადგენელი, აქციის 4 მონაწილეს თვალი დაუზიანდა, ერთმა მოქალაქემ და ერთმა სამართალდამცველმა კი თვალი დაკარგეს.

რუსთაველის გამზირზე აქცია მას შემდეგ დაიგეგმა, რაც პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა. 

20-21 ივნისის აქციების საქმის გამოძიების დასრულებამდე შსს-ს განსაკუთრებულ დავალებათა დეპარტამენტის უფროსს უფლებამოსილება შეუჩერდა.

imedinews.ge