საყოველთაო ჯანდაცვის ფარგლებში უფასო მედიკამენტებით 150 ათასიდან 200 ათას ადამიანამდე ისარგებლებს

საყოველთაო ჯანდაცვის ფარგლებში უფასო მედიკამენტებით დაახლოებით 150 ათასიდან 200 ათას ადამიანამდე ისარგებლებს. ამის შესახებ შრომის, ჯანმრთელობისა და სოციალური დაცვის მინისტრმა დავით სერგეენკომ დღეს გამართულ პრესკონფერენციაზე განაცხადა, სადაც საყოველთაო ჯანდაცვის პროგრამაში დიფერენცირებული პაკეტების ამოქმედებასთან დაკავშირებით ისაუბრა.

როგორც დავით სერგეენკომ აღნიშნა, სამიზნე პოპულაცია იქნება დაახლოებით 600 ათასი ადამიანი და ეს იქნება 5 ძირითადი ყველაზე გავრცელებული ქრონიკული დაავადებების სამკურნალო კონკრეტული მედიკამენტები.

"დაავადებათა კონტროლის ცენტრის შესაბამისმა სპეციალისტებმა საქართველოს სტატისტიკაზე და საერთაშორისო მტკიცებულებებზე დაფუძნებით გათვალეს ასაკობრივი ჭრილი, ჯანმრთელობის რისკის მიხედვით, ამ 600 ათასი ადამიანიდან რამდენს შეიძლება ჰქონდეს პოტენციური ქრონიკული დაავადება, რომელიც ფინანსდება საყოველთაო ჯანდაცვის ფარგლებში. ეს არ ნიშნავს, რომ 600 ათასივე ადამიანს აქვს ქრონიკული დაავადება. საბოლოო ჯამში, ჩვენ ვფიქრობთ, რომ ამ პროგრამის რეალური მოსარგებლე იქნება 150 ათასიდან 200 ათას ადამიანამდე, თუმცა, სხვადასხვა მასშტაბით. ზოგს შეიძლება დასჭირდეს მაგალითად, შედარებით იაფი პრეპარატი, დიაბეტის მეორე ტიპის სამკურნალო ტაბლეტები, იმიტომ, რომ პირველ ტიპზე, ინსულინზე უკვე არსებობს პროგრამა და ა.შ. ეს პროექტი ძალიან სკურპულოზური გათვლებით გაიწერა", - განაცხადა სერგეენკომ.

ჯანდაცვის სამინისტროს ინფორმაციით, სოციალურად დაუცველი ოჯახების მონაცემთა ერთიან ბაზაში რეგისტრირებული მოქალაქეები, რომელთა სარეიტინგო ქულა 0-დან 100 000-მდეა, ზაფხულიდან ქრონიკული დაავადებების სამკურნალო მედიკამენტები, საყოველთაო ჯანდაცვის პროგრამის ფარგლებში დაუფინანსდებათ. 
ეს დაავადებებია: მაღალი არტერიული წნევა; გულის უკმარისობა, კორონალური სისტემის დაავადებები; დიაბეტის მე-2 ტიპი; ფილტვების ქრონიკული დაავადებები; ფარისებრი ჯირკვლის დაავადებები.

როგორც ჯანდაცვის სამინისტროში განმარტავენ, მედიკამენტის შესყიდვისას მთავარი აქცენტი ხარისხზე გაკეთდება. თუ მედიკამეტი არ არის წარმოებული ევროკავშირის ქვეყნებში, ამ შემთხვევაში აუცილებელი იქნება ჯანდაცვის მსოფლიო ორგანიზაციის მიერ აკრედიტირებული ხარისხის კონტროლის ლაბორატორიის სერთიფიკატის წარმოდგენა. 
მედიკამენტების ღირებულება კი სიმბოლურად თვეში მაქსიმუმ 1 ლარი იქნება.
ipn.ge

2017 წლის ერთიანი ეროვნული გამოცდების თითოეული საგნის მაქსიმალური/მინიმალური გამსვლელი ქულები და საგამოცდო დროის ხანგრძლივობა

გთავაზობთ 2017 წლის ერთიანი ეროვნული გამოცდების თითოეული საგნის მაქსიმალური/მინიმალური გამსვლელ ქულებს და საგამოცდო დროის ხანგრძლივობას

გამოცდების წარმატებით ჩაბარებისთვის:  განათლების სახლი

ამბროლაური უფასო Wi-Fi-თ სრულად დაიფარა

"გაიცანი ambrolauri live-ში" ასე ჰქვია პროექტს, რომლის ფარგლებშიც ამბროლაური სრულად დაიფარა უფასო WI-FI სისტემით.

პროექტი ამბროლაურის მუნიციპალიტეტისა და სლოვაკეთის საელჩოს მხარდაჭერით განხორციელდა. აღნიშნული პროექტი სლოვაკეთისა და რაჭის 50-წლიანი მეგობრობის გაგრძელებაა.

პროექტის პრეზენტაციას სლოვაკეთის ელჩი რუდოლფ მიხალკა და ადგილობრივი თვითმმართველობის წარმომადგენლები დაესწრნენ.

imedinews.ge

იაპონიამ ყველაზე დიდი სამხედრო გემი პირველად გამოიყენა

იაპონიის საზღვაო თავდაცვის ავიამზიდი „იძუმო“ თავის პირველ მისიაზე გაუშვეს, რომლის მთავარი მიზანი ამერიკული ფლოტის დაცვაა. ამის შესახებ გამოცემა NHK წერს.

მედიის წყაროს ცნობით, იაპონური ფლოტის უდიდესმა გემმა, რომელსაც შეუძლია 28 საჰაერო აპარატის ტარება, 1 მაის იოკოსუკას ბაზა დატოვა და სამთვიან მისიაზე ფილიპინების ნაპირისკენ გაიმართა. გზაში ის აშშ-ის საზღვაო ძალებს მოამარაგებს, რომელიც იაპონურ ზღვაშია შესული.

აღსანიშნავია, რომ იაპონიას მეორე მსოფლიო ომის მერე, მეგობრული ქვეყნების დასაცავად პირველად საბრძოლო მოქმედებებში ჩარევის უფლება მიეცა, მიუხედავად იმისა, რომ შესაძლოა თვითონ ქვეყანა საფრთხის წინაშე არ არის.

გარდა ამისა, 2014 წელს იაპონიის ხელისუფლება კონსტიტუციის ახალი ინტერპრეტაცია მიიღო, რომლის მიხედვითაც თავდაცვის ძალებს მიეცად უფლება დაეცვათ ტოკიო გარე აგრესიისგან. ეს ნაბიჯი არ მოიწონეს პეკინსა და სეულში, მაგრამ მხარი დაუჭირეს ვაშინგტონში.

imedinews.ge

ახალაშენებული ბინების ფასი 7%-ით შემცირდა

ახალაშენებულ ბინების საშუალო ფასებზე გასულ წელთან შედარებით დაახლოებით 7%-იანი, ხოლო 2015 წელთან შედარებით დაახლოებით 6%-იანი კლებაა. ამის შესახებ ინფორმაციას გამოცემა bm.ge Colliers International Georgia-ზე დაყრდნობით ავრცელებს.

გამოცემა ორგანიზაციის შეფასებისა და კვლევის განყოფილების ძელმძღვანელთან ნიკოლოზ ქევხიშვილთან ინტერვიუს აქვეყნებს, რომლშიც ქევხიშვილი ამბობს, რომ 2017 წლის პირველ კვარტალში, დაახლოებით 200 მილიონი აშშ დოლარის საცხოვრებელი უძრავი ქონების ტრანზაქცია განხორციელდა.

"ფასებს რაც შეეხება, ამ მხრივ კლება გვაქვს. ყველაზე დიდი ტრანზაქციების რაოდენობა და მოცულობა საბურთალოზე მოდის, რასაც ბაზრის დაახლოებით 22% უჭირავს. მას სამგორი, გლდანი და დიდი დიღომი მოყვება. ვაკე და მთაწმინდა რაოდენობრივად მცირე სეგმენტია და ფასებიც ამ უბნებში შედარებით მაღალია. დეველოპერული პროექტები, რომლებიც თბილისში ხორციელდება ძირითადად საბურთალოზეა სეგმენტირებული", - განმარტავს ნიკოლოზ ქევხიშვილი.

ქევხიშვილი ამბობს, რომ მათ მიერ ჩატარებული კვლევის მიხედვით, ფასები ახალაშენებულ ბინებზე უფრო შემცირებულია, ვიდრე ძველ ბინებზე.

"ახალაშენებულ ბინების საშუალო ფასებზე გასულ წელთან შედარებით დაახლოებით 7%-იანი კლებაა, ხოლო 2015 წელთან შედარებით დაახლოებით 6%-იანი კლება. ჩვენი ანალიზის მიხედვით შეგვიძლია აღვნიშნოთ, რომ ფასების კლების მიზეზი ეკონომიკური მდგომარეობის ზოგადი ფონი იყო. ასევე გავლენა ვალუტის კურსმაც იქონია. მნიშვნელოვანია უცხოეთიდან ფულადი გზავნილებიც. მიუხედავად იმისა, რომ 2015 წელთან შედარებით ფულადი გზავნილების მცირედი ზრდა გვქონდა, წინა წლებთან შედარებით ეს მნიშვნელოვნად შემცირებულია. ზოგადად ახალაშენებულ ბინებზე უფრო მეტად შემცირდა ფასები, ვიდრე - ძველაშენებულ ბინებზე და ვფიქრობთ, რომ ეს ბუნებრივიც არის, რადგან დეველოპერები ბაზრის სუსტ სტიმულებზე უფრო სწრაფად ახდენენ რეაგირებას. მათ ფასების შემცირებით დააკომპენსირეს ის, რომ ტრანზაქციების რაოდენობა გაზარდეს. ფაქტიურად რაოდენობრივად და თანხობრივად ჯამური მოცულობით ზრდა იყო გასულ წელსაც და მიმდინარე წლის დასაწყისშიც", - განმარტა ნიკოლოზ ქევხიშვილმა.

დღეიდან საყოველთაო ჯანდაცვის დიფერენცირებული პაკეტები ამოქმედდა

საყოველთაო ჯანდაცვის პროგრამის პაკეტებში ცვლილებების მიხედვით, რომელიც 1 მაისიდან მოქმედებს, სოციალურად დაუცველი ოჯახების მონაცემთა ერთიან ბაზაში რეგისტრირებულ მოქალაქეებს, რომელთა სარეიტინგო ქულა 0-დან 100 000-მდეა, ქრონიკული დაავადებების სამკურნალო მედიკამენტები დაუფინანსდებათ.

საყოველთაო ჯანდაცვის პროგრამის ჯგუფები და დაფინანსების პირობები კი ასე გადანაწილდა: საშუალო შემოსავლის მქონე მოქალაქეებს, რომელთა ყოველთვიური შემოსავალი 1000 ლარზე მეტია, მაგრამ წლიური შემოსავალი არ აღემატება 40 000 ლარს, მიეცემათ არჩევნის საშუალება - ისარგებლონ საყოველთაო ჯანდაცვის პროგრამის შეზღუდული სერვისებით ან კერძო სადაზღვევო პაკეტით. გარდა ამისა, ამ კატეგორიაში შემავალ მოქალაქეებს პროგრამის ფარგლებში, კერძო დაზღვევის პაკეტის ქონის მიუხედავად, შეუნარჩუნდებათ ონკოლოგიური დაავადებების მკურნალობა კერძოდ, ქიმიო და ჰორმონოთრაპია. ასევე, მშობიარობა/საკეისრო კვეთის მომსახურება. 

თვითდასაქმებულ, არარეგულარული შემოსავლის მქონე პირებს კერძო დაზღვევის ქონის მიუხედავად, შეუნარჩუნდებათ საყოველთაო ჯანდაცვის პროგრამით სარგებლობის უფლება, თუმცა მცირედ შეზღუდული პაკეტით. 

სოციალურად დაუცველ მოქალაქეებს, პირებს რომელთა სარეიტინგო ქულა 70 000-დან 100 000-მდეა, და 6-დან 18 წლამდე ასაკის მოზარდებს საყოველთაო ჯანდაცვის პროგრამით გათვალისწინებული სერვისების მოცულობა უცვლელად შეუნარჩუნდებათ. ამასთან, მათ არ ეზღუდებათ კერძო სადაზღვევო პაკეტით სარგებლობის უფლება. 

მაღალი შემოსავლის მქონე მოქალაქეებს, რომელთა შემოსავალი წელიწადში 40 000 ლარს აღემატება საყოველთაო ჯანდაცვის პროგრამით ვეღარ ისარგებლებენ.

ცვლილების მიზანია სოციალური სამართლიანობის შექმნა. გარდა ამისა, სადაზღვევო ინდუსტრიას ექნება ყველა ბერკეტი, რომ აქტიური მარკეტინგით შეძლონ, მომხმარებლების მიზიდვა.

imedinews.ge

120 000 ავტომობილისთვის ტექდათვალიერების გავლა აუცილებელია

ავტომობილებისთვის ტექდათვლიერების ჩატარების უფლება ამ ეტაპზე 24 კომპანიას აქვს, ინფორმაციას ამის შესახებ bm.ge ავრცელებს. აკრედიტაციის ცენტრის ხელმძღვანელის პაატა გოგოლიძის განცხადებით, 24 კომპანიას ამ ეტაპზე შეუძლია 300 ათასამდე მანქანა შეამოწმოს.

„რეალურად დღეს მხოლოდ 120 ათასამდე მანქანას უდგას შემოწმების საჭიროება, თუმცა, ამ ეტაპისთვის, შესამოწმებლად  მისული ავტომანქანების რაოდენობა  არის 35 ათასამდე“,- აცხადებს პაატა გოგოლიძე და აღნიშნავს, რომ ამ ეტაპზე საგზაო მოძრაობის უსაფრთხოების შესახებ კანონი ითვალისიწნებს ტექდათვალიერებას მხოლოდ ავტობუსებისა და სატვირთო მანქანებისთვის. მისი ინფორმაციით, კომპანიები დარეგისტრირებულები არიან როგორც თბილისში, ასევე რუსთავში, საგარეჯოში, გურჯაანში, გორში, თელავში, საჩხერეში, ქუთაისში, ზუგდიდში, ფოთში, ბათუმსა და ახალციხეში.

ავტომანქანების სავალდებულო ტექდათვალიერების ამოქმედება მომავალი წლიდან დაიწყება, მანამდე კი სახელმწიფომ უნდა უზრუნველყოს საამისოდ აუცილებელი ყველა ტექნიკური პირობის შექმნა.

imedinew.ge