ბრძოლა ტამიშთან

24 წლის წინ, 1993 წლის 2 ივლისს, გამთენიისას, დაახლოებით 5-ის ნახევარზე, რუსულმა სამხედრო ხომალდმა სოფელ ტამიშის მისადგომებთან დაახლოებით 600 კბილებამდე შეიარაღებული, კარგად გაწვრთნილი საზღვაო დესანტი გადმოსხა. მიუხედავად იმისა, რომ ქართული მხარისთის ეს სრული მოულოდნელობა იყო, დესანტზე საკმაოდ სწრაფი და ორგანიზებული რეაგირება განხორციელდა. იმ ნაწილებისთვის, რომლებიც მათ პირველები შეხვდნენ, ეს გამანადგურებელი აღმოჩნდა. დიდი ზარალი ნახა ჩოლოყაშვილის ბატალიონმა და წითელაშვილის „ავაზამ“. პარალელურად შეტევა დაიწყო ზემო მხრიდან, ლაბრის მიმართულებით, სადაც დუშეთის ბატალიონის ბიჭები იყვნენ. მათ საოცარი სიმტკიცე გამოიჩინეს, მაგრამ, სამწუხაროდ, მათი დახმარების არანაირი საშუალება არ იყო, დაჭრილების ევაკუაციაც კი ვერ ხერხდებოდა.
დაახლოებით, 10-სა და 11 საათს შორის პირველი კორპუსის სარდლობამ სასწრაფოდ მოახდინა ბაბუშერადან სადესანტო-საშტურმო ბატალიონის ჩვენს პოზიციებზე გადმოსროლა. ამან საშუალება მოგვცა, ხაზი შეგვეკრა და ჩვენს მეომრებს პოზიციები აღარ დაუთმიათ. შეიძლება ითქვას, რომ დესანტზე რეაგირება საკმაოდ პროფესიონალური იყო. ბრძოლაში ჩართული იყო აფხაზეთის ტერიტორიაზე მყოფი ყველა ქვედანაყოფი. გადამწყვეტი როლი ითამაშეს სოხუმის 23-ე და 24-ე ბრიგადებმა, რომლებიც, ძირითადად, ადგილობრივებით იყო დაკომპლექტებული. დესანტის მოსაგერიებლად თავდაუზოგავად იბრძოდა ქართული არტილერიაც. ბრძოლა 9 დღის განმავლობაში გრძელდებოდა და უდიდესი მსხვერპლის ფასად (ქართულმა მხარემ სამი საათის განმავლობაში დაახლოებით 300 მეომარი დაკარგა), დესანტის მოგერიებით დასრულდა. 11 ივლისს ოჩამჩირე-სოხუმის მაგისტრალი მთლიანად გაიხსნა. 
ტამიშში რუსული დესანტის გადმოსხმა სოხუმის აღებისკენ იყო მიმართული, მაგრამ დესანტის მოგერიებამ ეს გეგმა რამდენიმე თვით გადაწია. აფხაზეთის ომის ერთ-ერთი ეპიზოდის - 1993 წლის ივლისის ბრძოლა -საქართველოს ისტორიაში შევა, როგორც ქართველი მეომრების თავგანწირვის უდიდესი მაგალითი.

განათლების სახლის საჩუქარი სკოლას

მაღალკვალიფიციური მომზადება ხელმისაწვდომ ფასად

                              ყიდვა, გაყიდვა და ყველა საქმიანი განცხადება