Friday, October 10, 2014

მაგისტრანტების საყურადღებოდ!

საქართველოს განათლებისა და მეცნიერების მინისტრის 2014 წლის 9 ოქტომბრის №135/ნ ბრძანების საფუძველზე ცვლილება განხორციელდა "სამაგისტრო გამოცდების ჩატარების დებულებისა და სახელმწიფო სასწავლო სამაგისტრო გრანტის განაწილების წესის" №227 ბრძანებაში, რომლის თანახმად:


1. თუ მაგისტრანტს ჩაბარებული აქვს უმაღლესი საგანმანათლებლო დაწესებულების/დაწესებულებების ორ ან რამდენიმე საგანმანათლებლო პროგრამულ მიმართულებაზე, მისი დაფინანსება ხორციელდება აბსოლუტური ქულით რანჟირების საფუძველზე მის მიერ საგანმანათლებლო პროგრამულ მიმართულებებს შორის განსაზღვრული პრიორიტეტების შესაბამისად. პრიორიტეტის დადგენის მიზნით, შესაბამისი წლის 20 ოქტომბრამდემაგისტრანტი ცენტრში წარადგენს განცხადებას, რომელშიც უთითებს საგანმანათლებლო პროგრამული მიმართულებების ჩამონათვალს პრიორიტეტების შესაბამისად. 

2. ცენტრში 20 ოქტომბრამდე მაგისტრანტის მიერ პრიორიტეტის დადგენის მიზნით, განცხადების წარუდგენლობისას, მისი დაფინანსების საკითხის გადაწყვეტისთვის, აბსოლუტური ქულით რანჟირება პირველ რიგში ხორციელდება იმ საგანმანათლებლო პროგრამულ მიმართულებაზე, რომელზეც შესაბამის წელს საქართველოს მთავრობის მიერ განსაზღვრული პროცენტული მაჩვენებლის ფარგლებში მეტი თანხა განაწილდა. იმ შემთხვევაში, თუ შესაბამის წელს საქართველოს მთავრობის მიერ განსაზღვრული პროცენტული მაჩვენებლის ფარგლებში თანაბარი თანხა განაწილდა, მაშინ აბსოლუტური ქულით რანჟირება პირველ რიგში განხორციელდება ცენტრის მიერ განსაზღვრულ პროგრამულ მიმართულებაზე. 

4. მაგისტრანტი, რომელიც შესაბამის წელს ჩაირიცხება ორი ან რამდენიმე უმაღლესი საგანმანათლებლო დაწესებულების ერთსა და იმავე საგანმანათლებლო პროგრამულ მიმართულებაზე, ვალდებულია შესაბამისი წლის 20 ოქტომბრამდე ცენტრში წარადგინოს განცხადება, თუ რომელ უმაღლეს საგანმანათლებლო დაწესებულებაში სურს მიიღოს გრანტი. განცხადების წარუდგენლობისას მაგიტრანტობის კანდიდატი გრანტს მოიპოვებს ცენტრის მიერ განსაზღვრულ უმაღლეს საგანმანათლებლო დაწესებულებაში. 

სკოლის გამოსაშვები გამოცდების პროგრამების პროექტი - 2015


Tuesday, October 7, 2014

ნორჩ-გამომგონებელთა კონკურსი „ლეონარდო და ვინჩი 2014“

განათლებისა და მეცნიერების სამინისტროს შოთა რუსთაველის ეროვნული სამეცნიერო ფონდი ნორჩ-გამომგონებელთა კონკურსს „ლეონარდო და ვინჩი 2014“ აცხადებს.
საკონკურსო პროგრამის დეტალებზე საქართველოს განათლებისა და მეცნიერების მინისტრის მოადგილემ ლია გიგაურმა და შოთა რუსთაველის ეროვნული სამეცნიერო ფონდის გენერალურმა დირექტორმა მარინე ჩიტაშვილმა ისაუბრეს.
კონკურსში მონაწილეობის მიღება შეუძლიათ საქართველოს ზოგადსაგანმანათლებლო დაწესებულებების მოსწავლეებს, როგორც ინდივიდუალურად, ასევე ჯგუფურად. მსურველებს ნამუშევრების ელექტრონული დარეგისტრირება განათლებისა და მეცნიერების სამინისტროსა და რუსთაველის ეროვნული ფონდის ვებ-გვერდებზეwww.mes.gov.gewww.rustaveli.org.ge 8 ოქტომბრიდან შეეძლებათ. წარმოდგენილი პროექტი უნდა მოიცავდეს გამოგონების, როგორც ტექსტუალურ აღწერილობას, ასევე შესაბამის მაკეტს, მოდელს ან ნახაზებს. ელექტრონული რეგისტრაცია 3 ნოემბერს, ხოლო ნამუშევრების ფონდში წარმოდგენა 13 ნოემბერს დასრულდება.
კონკურსის გამარჯვებულებს კომპეტენტური ჟიური 6 დეკემბერს დაგეგმილ გამოფენაზე გამოავლენს.
კონკურსში გამარჯვებული პროექტების ავტორები ფულადი პრემიებითა და სპეციალური საჩუქრებით დაჯილდოვდებიან. I ადგილზე გასული პროექტის წარმომდგენს 5000 ლარი, II ადგილს - 3 000 ლარი, ხოლო III ადგილს - 2 000 ლარი გადაეცემა. გრანპრის მფლობელი პროექტის ავტორი ან ავტორები კი შემეცნებითი ტურით საზღვარგარეთ გაემგზავრებიან.
კონკურსის გამარჯვებული ოთხივე პროექტის ავტორი გაზაფხულზე ამერიკის შეერთებულ შტატებში გაემგზავრება, სადაც საქართველოს სახელით მონაწილეობას მიიღებენ ინტელის საერთაშორისო სამეცნიერო-საინჟინრო გამოფენაში - Intel ISEF.
კონკურსი გამოავლენს და წაახალისებს შემოქმედებითი აზროვნების, გამომგონებლის ნიჭით დაჯილდოებულ მოზარდებს და ხელს შეუწყობს მათი ინოვაციური და პრაქტიკული უნარ-ჩვევების განვითარებას.

Monday, October 6, 2014

"მოქალაქის" მოსწავლე-სტუდენტებისთვის გათვლილ ორმილიონიან პროექტებს "ნაეკი" განახორციელებს

”მოქალაქის”  მოსწავლე-სტუდენტებისთვის გათვლილ ორმილიონიან პროექტებს ”ნაეკი” განახორციელებს"სტუდენტები თვითმმართველობისთვის" და "სამოქალაქო განათლების ოლიმპიადა" ასე ქვია იმ ორ პროექტს, რომელის განხორციელებასაც ბიძინა ივანიშვილის მიერ დაფუძნებული არასამთავრობო ორგანიზაცია "მოქალაქე" ხვალიდან იწყებს და რონაწილეობის უფლებაც სკოლის მოსწავლეებს, ბაკალავრებს და მაგისტრანტებს შეეძლებათ. პროექტების პრეზენტაცია დღეს ეროვნულ ბიბლიოთეკაში შედგა.

რას გულისხმობს თითეული პროექტი და რა ჯდება მათი განხორციელება, ამ საკითხებზე პროექტის ორგანიზატორები Aris.ge-განათლება დეტალურად ესაუბრნენ. 


პროექტების პრეზენტაციას ყოფილი პრემიერ-მინისტრი და "მოქალაქის" დამფუძნებელი ბიძინა ივანიშვილიც ესწრებოდა. Aris.ge-განათლებისკითხვაზე "არის თუ არა განათლების სფერო "მოქალაქის" პრიორიტეტი" მან შემდეგი შინაარსის პასუხი გასცა:

"სახელმწიფოს განვითარებასა და წარმატებულად ფუნქციონრებაში ყველამ უნდა მივიღოთ მონაწილეობა. კარგი იქნება, თუ ახალი თაობა სკოლის მერხებიდანვე მიეჩევევა თავისი წილი პასუხიმგებლობის აღებას". 

მისივე ინფორმაციით, თითეული პროექტის განხორციელება არანაკლებ ერთი მილიონი ლარი დარჯდება. "პროექტის მიზანი კი საზოგადოების ყველაზე მნიშვნელოვანი ნაწილის - მოსწავლეებისა და სტუდენტების გააქტიურებაა".

როგორც დღეს გახდა ცნობილი, "მოქალაქის" მიერ დაფინანსებული ორივე პროექტის ადმინისტრირებასა და მომზადებას შეფასებისა და გამოცდების ეროვნული ცენტრი ახდენს. 

Aris.ge-განათლებას პროექტების განხორციელების დეტალებზე სწორედ ცენტრის ხელმძღვანელი მაია მიმინოშვილი ესაუბრა.

"სამოქალაქო განათლების ოლიმპიადა მიზნად ისახავს მოსწავლეებში სამოქალაქო ღირებულების დამკვიდრების ხელშეწყობას. პროექტით განსაზღვრულია აქტიური და პასუხიმგებლობის გრძნობის მქონე მოქალაქეების აღზრდის ხელშეწყობა,"- აცხადებს მიმინოშვილი. 

მისივე ინფორმაციით, ოლიმპიადაში მონაწილეობის მიღება IX-XIIკლასის მოსწავლეებს შეეძლებათ.
რაც შეეხება ოლიმპიადის ჩატარების სქემას - ის სამ ეტაპად გაიმართება. 


"პირველი შესარჩევი ტური ჩატარდება ყველა სკოლაში. პირველ ეტაპში ორიათასამდე მოსწავლე მიიღებს მონაწილეობას. მეორე შესარჩევ ტურში ორასი მოსწავლე გადავა. ამ ტურში მათ მოუწევთ სამოქალაქო განვითარების საკითხზე არა ტესტური, არამედ ღია დავალების შესრულება. ესეების შექმნა, არგუმენტირება, მსჯელობა... მესამე ტური ორ ნაწილიანი იქნება. საბოლოო ეტაპზე კი ოცი საუკეთესოს არჩევა მოხდება. ისინი მოამზადებენ თემებზე საჯარო პრეზენტაციებს და სწორედ ეს ოცი მოსწავლე შეიძლება ჩაითვალოს ოლიმპიადის გამარჯვებულად,"- განაცხადა მაია მიმინოშვილმა. 

რაც შეეხება პროექტების ფარგლებში წახალისების ფორმებს ამაზე ARIS.GE-განათლებას "მოქალაქის" საზოგადოებასთან ურთიერთობის ხელმძღვანელი ნიკო ჩხეტიანი ესაუბრა. 

"საჩუქრები კონკურსის ყველა ეტაპზე იქნება. ყველა ტურის შემდეგ საჩუქრები უფრო ღირებული გახდება. გამარჯვებული 20-22 მოსწავლე კი საზღვარგარეთ ენის შემსაწავლელი კურსებით დაჯილდოვდება. მათ დასავლეთ ევროპის ქვეყნებში ინგლისური, ფრანგული და გერმანული ენების შესწავლა შეეძლებათ." 

რაც შეეხება "სტუდენტები თვითმმართველობისათვის" პროექტის გამარჯვებულ გუნდებს, ისინი ევროპაში თემატური მოგზაურობით დაჯილდოვდებიან და წამყვანი ქვეყნების თვითმმართველობების სამუშაო პროცესს ადგილზე გაეცნობიან. ამ პროექტის მიზანიც სამოქალაქო საზოგადოების განვითარების პროცესში ახალგაზრდების ჩართულობაა. 

მაია მიმინოშვილის ინფორმაციით, სტუდენტებს საშუალება ექნებათ რამდენიმე კაციანი ჯგუფები შექმნან. აირჩიონ ქვეყნის მასშტაბით ნებისმიერი მუნიციპალიტეტი. ჩავიდნენ ადგილზე, აწარმოონ კვლევები, შეისწავლონ მუნიციპალიტეტის პრობლემები და საჭიროებები, ბიუჯეტის ხარჯვის პროცესი და მოამზადონ შესაბამისი დოკუმენტები. 

"იდეა ძალიან კარგია, მსგავსი პროექტი საქართველოში არ განხორციელებულა. პირველ ეტაპზე გამარჯვებულმა სტუდენტურმა გუნდებმა უნდა გააკეთონ ჩამონათვალი რომელ მუნიციპალიტეტში სურთ მუშაობა. შემდეგ დაასაბუთონ რატომ აირჩიეს ესა თუ ის რეგიონი. ჩავიდნენ კონკრეტულ მუნიციპალიტეტში. შექმნან ფოკუს ჯგუფები, ჩაწერონ ინტერვიუები, მოახდინონ პრობლემების იდენტიფიცირება, მოიძიონ მათი მოგვარების გზები და შექმნან ანალიტიკური დოკუმენტი. საბოლოო ეტაპზე კი მუნიციპალიტეტის განვითარების გეგმის შედგენა მოუწევთ,"- ამბობს მაია მიმინოშვილი. 

ორივე პროექტში მონაწილეობის მსურველების რეგისტრაცია ხვალ დაიწყება და 7 ნოემბრამდე გაგრძელდება. კონკურსებში გამარჯვებულები კი სავარაუდოდ მაისის თვეში გამოვლინდებიან. 

დამატებითი ინფორმაციის მოპოვება დაინტერესებულ პირებს სოციალურ ქსელ "ფეისბუქის" შესაბამისი სახელწოდების გვერდებსა და "მოქალაქის" ოფიციალურ ვებ გვერდზე შეუძლიათ. 

რაც შეეხება პროექტის სამომავლო გეგმებს: როგორც ორგანიზატორები ამბობენ "გაგრძელდება თუ არა პროექტები მომავალში, ეს იმაზეა დამოკიდებული, რამდენად გაამართლებს საპილოტე ვერსია". 

ეკა არის© წივწივაძე

ვეტერანთა შვილები მაგისტრატურაში უფასოდ ისწავლიან


ვეტერანთა შვილები მაგისტრატურაში უფასოდ ისწავლიან ვეტერანთა შვილებს ამიერიდან შესაძლებლობა აქვთ, მაგისტრატურაში უფასოდ ისწავლონ. განათლებისა და მეცნიერების სამინისტრომ 30-მდე აპლიკანტისთვის სპეციალური სტიპენდიები გამოყო. ამისთვის მსურველებმა მიმდინარე წლის 20 ოქტომბრის ჩათვლით სამინისტროში განცხადება უნდა დაწერონ და ვეტერანის ოჯახის წევრობის დამადასტურებელი მოწმობა დაურთონ. 
ვეტერანების საქმეთა სახელმწიფო სამსახურთან ერთად, განათლების სამინისტრო სამომავლოდ ვეტერანებისა და მათი ოჯახებისთვის რამდენიმე პროექტს გეგმავს.
ipn.ge

ივანიშვილი მოსწავლეებისა და სტუდენტებისთვის პროექტების დაწყებას გეგმავს

ყოფილი პრემიერ-მინისტრი, ბიძინა ივანიშვილი ამბობს, რომ მიმდინარე თვეში საზოგადოებისთვის ცნობილი გახდება იმ ფართომასშტაბიანი პროექტების შესახებ, რომელშიც მოსწავლეები და სტუდენტები იქნებიან ჩართული. ამის შესახებ ივანიშვილი "კვირის პალიტრასთან" საუბრობს. 
ყოფილი პრემიერი ამბობს, რომ პროექტები, რომლებზეც"საკმაოდ ბევრი" იმუშავა, "სამოქალაქო საზოგადოების განვითარებისა და საერთოდ, საზოგადოების განვითარებას" შეეხება.

"მე ვხედავ ჩემს ადგილს და როლს და მინდა ჩემი გასაკეთებელი გავაკეთო,"- ამბობს ივანიშვილი.

როგორც ის განმარტავს, საქართველოს მასშტაბით მოსწავლეებს სკოლებში კითხვარები დაურიგდებათ კითხვებით, რა არის სამოქალაქო საზოგადოება, როგორი უნდა იყოს მოქალაქე და ა.შ.

"აზრი იქნება ის, რომ სკოლის მოსწავლეებმა მონაწილეობა მიიღონ და გამოავლინონ ჩართულობა, პირველ ეტაპზე ცოდნის სახით. ყველა უნდა იყოს პასუხისმგებლიანი, ყველამ უნდა იზრუნოს საკუთარ სამშობლოზე, ყველას უნდა ჰქონდეს განცდა პასუხისმგებლობის, მიადევნონ თვალი პოლიტიკურ პროცესებს და ა.შ. სკოლაშივე უნდა ისწავლოს საზოგადოებამ, რომ ისინი საზოგადოების წევრები არიან და მათ მოუწევთ მონაწილეობა მიიღონ საკუთარი საზოგადოებისა და ქვეყნის განვითარებაში,"- ამბობს ბიძინა ივანიშვილი.

პროექტის ბოლოს, როგორც ის ამბობს, გამარჯვებულები დაჯილდოვდებიან. 

მეორე ფართომასშტაბიანი პროექტი სტუდენტებისთვისაა.

"დღევანდელ პოლიტიკურ პროცესებში სტუდენტების ჩართულობას უნდა მივაღწიოთ. რეგიონებში, საკრებულოების დონეზე. ის ბიუჯეტი, რაც გააჩნიათ რეგიონებს, მოხდეს მათი განხილვა, გაკრიტიკება და უკეთესი ვარიანტების შეთავაზება, სად და როგორ უნდა დაიხარჯოს კონკრეტულ რეგიონში ფინანსები."  

ნინო კახიშვილი netgazeti.ge

Thursday, October 2, 2014

რა იცვლება ზოგადი განათლების კანონში

განათლების რეფორმა,

2015 წლიდან საჯარო სკოლის პედაგოგთა სერტიფიცირება სავალდებულო აღარ იქნება. საქართველოს პარლამენტმა პირველი მოსმენით უკვე განიხილა მთავრობის მიერ ინიცირებული კანონპროექტი „ზოგადი განათლების შესახებ“. დღეისათვის სერტიფიცირებულ მასწავლებელთა რიცხვი 20 ათასს არ აღემატება, ხოლო ვისაც კვალიფიკაციის დამადასტურებელი სერტიფიკატი არ აქვს, დაახლოებით 42 ათასია. გარდა ამისა, ქვეყანას ჰყავს 2000-მდე მასწავლებელი, რომლებმაც სერტიფიცირება გაიარეს, თუმცა სკოლებში ვერ მუშაობენ.
დღეს არსებული კანონმდებლობით, ყველა მოქმედ მასწავლებელს 2014 წლის ბოლომდე უნდა ჩაებარებინა მასწავლებლის სასერტიფიკაციო გამოცდა, მასწავლებლობის უფლების მოსაპოვებლად.

„ამ ნორმის საფუძველზე 2015 წლიდან ზოგადსაგანმანათლებლო დაწესებულებებში შეიქმნება მასწავლებელთა დეფიციტი, იმდენად რამდენადაც სერტიფიცირებული მასწავლებლების დღეს არსებული რაოდენობა არ იქნება საკმარისი ყველა ზოგადსაგანმანათლებლო დაწესებულებაში სასწავლო პროცესის წარსამართად,“ - ნათქვამია პარლამენტში წარდგენილი კანონპროექტის განმარტებით ბარათში.

„ამ საკანონმდებლო ცვლილებების ძირითად ხარვეზად მიმაჩნია ის, რომ დაგეგმილია ამოიღონ ფრაზა - „სერტიფიცირება უნდა გაიარონ 2014 წლის ბოლომდე".

ასევე გარკვეული კითხვები მაქვს შემდეგ ჩანაწერთან, რომლის მიხედვითაც საჯარო სკოლებთან სამართლებრივი დავის შემთხვევაში საჯარო სკოლას წარმოადგენს განათლებისა და მეცნიერების სამინისტროს იურისტი,“ - ამბობს სამოქალაქო განვითარების ინსტიტუტის განათლების სპეციალისტი თამარ მოსიაშვილი.

მისივე თქმით, მასწავლებლებს საკმარისი დრო ჰქონდათ იმისათვის, რომ დაემტკიცებინათ საკუთარი კვალიფიკაცია.

„სამწუხაროა, რომ ადამიანებმა ხუთი წლის განმავლობაში ვერ შეძლეს არც თუ ისე რთული გამოცდის ჩაბარება. ამ გამოცდით საგნის თეორიული ცოდნა და სწავლების მეთოდიკა მოწმდებოდა. ეს არის ის აუცილებელი მინიმუმი, რაც ყველა მასწავლებელს უნდა ჰქონდეს, რომ შემდეგ, სკოლაში ბავშვებს ასწავლის, ჰქონდეს შესაძლებლობა შედგეს, როგორც წარმატებული მასწავლებელი.

ახლა გვაქვს ასეთი რეალობა - გვყავს 20 ათასამდე სერტიფიცირებული მასწავლებელი, რომლებმაც სახელმწიფოს დაუმტკიცეს თავიანთი კვალიფიკაცია, 42 ათასი არასერტიფიცირებული მასწავლებელი, ასევე 2000 სერტიფიცირებული მასწავლებელი, რომლებიც არიან სისტემის მიღმა. ეს არის მოცემულობა, რომელიც არ უნდა შევაფასოთ როგორც კატასტროფული, მაგრამ ისიც უნდა გვახსოვდეს, რომ ნათელი რეგულაციების პირობებში ბევრ ნიჭიერ ახალგაზრდას
შეიძლება მოუნდეს სკოლაში მუშაობის დაწყება. სახელმწიფოს სამომავლო მიზანი უნდა იყოს სერტიფიცირებული მასწავლებელი და ახალგაზრდა ნიჭიერი კადრის სკოლაში მოზიდვა", - ამბობს თამარ მოსიაშვილი.

განათლების სპეციალისტი კანონში შესატან ცვლილებებში პოზიტივს მასწავლებელთა კარიერული ზრდის სქემაში ხედავს.

„ახალი სქემა მასწავლებლებს ნათლად უჩვენებს გზას, როგორ გადავიდნენ ერთი კატეგორიიდან მეორეზე. სამწუხაროდ, დღემდე პროფესიული განვითარების სქემა არ იყო ამ ქვეყნისთვის პრიორიტეტი და მასზე ნაკლები ყურადღება მახვილდებოდა,“ - ამბობს თამარ მოსიაშვილი.
პირველი მოსმენისას კანონპროექტი პარლამენტში საქართველოს განათლებისა და მეცნიერების მინისტრის მოადგილემ, ქეთევან ნატრიაშვილმა წარადგინა.

„კანონპროექტის თანახმად, მასწავლებელთა სერტიფიცირების მოდელი შეიცვლება მასწავლებლის პროფესიაში შესვლის, განვითარებისა და კარიერული ზრდის ახალი სქემით, რომელიც დაეფუძნება მასწავლებლის შეფასების კომპლექსურ სისტემას. ზოგადსაგანმანათლებლო დაწესებულების მასწავლებლები კომპეტენციებისა და საქმიანობის შედეგების მიხედვით დაიყოფიან პროფესიულ კატეგორიებად", - ვკითხულობთ „ზოგადი განათლების შესახებ“ კანონპროექტის განმარტებით ბარათში.

მენტორი მასწავლებელი (უმაღლესი კატეგორია), მკვლევარი (პირველი კატეგორია), წარჩინებული (მეორე კატეგორია), პრაქტიკოსი (მესამე კატეგორია) - ასეთი იქნება მასწავლებელთა პროფესიული კატეგორია.

როგორ მიანიჭებენ კატეგორიებს, როგორ შეინარჩუნებენ მას, რა იქნება პროფესიული განვითარებისა თუ კარიერული ზრდის პრინციპები, ასევე რა მექანიზმები აღიწერება მასწავლებლის პროფესიაში შესვლის, განვითარებისა და კარიერული ზრდის ახალ სქემაში, საქართველოს მთავრობას ჯერ არ დაუმტკიცებია. ცნობილია, რომ ერთი კატეგორიიდან მეორეზე გადასვლა მასწავლებელს დაუდასტურდება შესაბამისი სახელმწიფო სერტიფიკატით.

კანონპროექტის მიხედვით, მასწავლებლის პროფესიულ საქმიანობაზე დაკვირვებისა და შეფასების საფუძველზე მასწავლებელი კრედიტ-ქულებს აგროვებს, რის საფუძველზეც შესაბამის კატეგორიას მიანიჭებს საიდენტიფიკაციო კომისია. საიდენტიფიკაციო კომისია იქნება წარმომადგენლობითი ორგანო, სადაც იქნება როტაციის პრინციპით დაკომპლექტებული ექსპერტთა ჯგუფი.

ჯერ არ არის გარკვეული, თუ როგორ აისახება მასწავლებლის კვალიფიკაცია მისი ხელფასის ოდენობაზე.

თამარ მოსიაშვილი: „რამდენადაც ჩემთვისაა ცნობილია, მასწავლებელთა ხელფასთან დაკავშირებით გადაწყვეტილებას გავიგებთ ნოემბერში. დაველოდოთ ნოემბერს და ვნახავთ, როგორ მოუმატებენ მასწავლებლებს ხელფასებს. ტენდენცია, რომელიც შეინიშნება მასწავლებლების ხელფასის მატების მხრივ, ცალსახად პოზიტიურია".