საქართველოს ეროვნული ბანკი ქართული ფულის თემაზე ბავშვებისა და მოზარდებისთვის ხატვის ღია კონკურსს აცხადებს სახელწოდებით „ეროვნული ბანკის მომავალი პრეზიდენტი."
"ხატვის კონკურსის მიზანია ბავშვები და მოზარდები დააფიქროს ქართული ფულის ისტორიის, ფუნქციებისა და მნიშვნელობის შესახებ, და მისცეს მათ საშუალება ფინანსურ საკითხებთან მიმართებაში საკუთარი ხედვა და დამოკიდებულება შემოქმედებითი გზით წარმოადგინონ. ამ თვალსაზრისით, კონკურსი სრულად ეხმიანება "გლობალური ფულის კვირეულის" 2018 წლის გზავნილს: "ფულთან დაკავშირებული საკითხები მნიშვნელოვანია," - წერია ეროვნული ბანკის განცხადებაში.
ხატვის კონკურსში მონაწილეობის მიღება საქართველოს მასშტაბით II–VII კლასის ნებისმიერ მოსწავლეს შეუძლია. კონკურსის ფარგლებში, მონაწილეებმა უნდა დახატონ მიმოქცევაში არსებული რომელიმე ნომინალის ქართული ბანკნოტი ან მონეტა, არსებული ან საკუთარი ფანტაზიით შექმნილი დიზაინით, და საკუთარი ნამუშევრები არაუგვიანეს 28 თებერვლისა წარუდგინონ სკოლის ადმინისტრაციას.
ქვეყნის მასშტაბით საუკეთესო 20 ნამუშევარს სპეციალური ჟიური გამოავლენს.
ნამუშევრები დაიბეჭდება ეროვნული ბანკის წლიურ ანგარიშში და გამოიფინება ეროვნული ბანკის ფოიეში. გარდა ამისა, გამარჯვებულ ახალგაზრდებს ეროვნული ბანკი ყვარლის ფულის მუზეუმში ექსკურსიაზე უმასპინძლებს, სადაც ბავშვები გაეცნობიან ფულის ისტორიას, მოისმენენ საინტერესო ლექციას ფინანსური განათლების შესახებ და მიიღებენ სიმბოლურ საჩუქრებს.
imedinews.ge
No comments:
Post a Comment