როგორც დედაქალაქის მერმა, კახა კალაძემ ჟურნალისტებს განუცხადა, მომდევნო წლების განმავლობაში თბილისში ელექტროავტობუსებს შემოიყვანენ.
"დღეს შემოვიყვანეთ ერთი ავტობუსი, რომელიც არის სრულად ელექტრო. გვინდა, რომ ერთი თვის განმავლობაში სხვადასხვა ხაზებზე ვატაროთ და გავტესტოთ, თუ როგორ უნდა მოეწყოს შემდეგ ინფრასტრუქტურა. იცით, რომ განვითარებული ქვეყნები 2023 წლიდან აპირებენ გადასვლას ელექტროავტობუსებზე. ზოგადად ეს მიმართულება მთელ მსოფლიოში თანდათან იხვეწება და საინტერესო ხდება. ჩვენც არ ვიქნებით გამონაკლისი, დედაქალაქსაც ეყოლება ელექტროავტობუსები. მომდევნო წლების განმავლობაში, როდესაც ეს მიმართულება განვითარდება, აუცილებლად შემოვიყვანთ ელექტროავტობუსებს. ასევე, ჩვენ ვმუშაობთ ავტობუსების ქარხნის აშენებაზე საქართველოში და უახლოეს მომავალში ამაზეც მოგაწვდით ინფორმაციას",- განაცხადა კალაძემ.
ცნობისთვის, თბილისის სატრანპორტო კომპანიის მეორე ავტობაზაზე, კომპანია "ფრეგობასმა" ელექტროავტობუსის პრეზენტაცია გამართა.
ღონისძიებას დედაქალაქის მერი კახა კალაძე, გერმანული კომპანია “EURABUS"-ის გენერალური დირექტორი ქრისტიან საიცი, სატრანსპორტო კომპანიისა და "ფრეგობასის" წარმომადგენლები დაესწრნენ.
ავტობუსი ორი კვირის განმავლობაში სატესტო რეჟიმში სხვადასხვა მარშრუტზე იმოძრავებს. როგორც დედაქალაქის მერიაში აცხადებენ, ტესტირების პროცესის მიზანია ელექტოავტობუსების ტექნიკური მახასიათებლების გამოცდა ქალაქის ინფრასტრუქტურისა და საექსპლუატაციო პირობების გათვალისწინებით.
თავის მხრივ, თბილისის სატრანსპორტო კომპანიის ავტობუსების ექსპლუატაციის დირექტორმა პაატა ბეჟანიშვილმა განაცხადა, რომ ელექტროავტობუსის დამუხტვას 3 საათი სჭირდება და ის ამ ენერგიით 250 კილომეტრს გადის.
„გაფორმებული გვაქვს ერთთვიანი ხელშეკრულება და ამ პერიოდის განმავლობაში ავტობუსი სატესტო რეჟიმში იმუშავებს. როგორც "ფრეგობასის" ტექნიკური პერსონალი გვეუბნება, ერთი დამუხტვით ავტობუსი გადის 250 კილომეტრს. დამუხტვა 3 საათის განმავლობაში გრძელდება და მაჩვენებელთა დაფაზე აღირიცხება, რომ 100 %-ით დამუხტულია. ხვალიდან ავტობუსს სხვადასხვა მარშრუტებზე დავუშვებთ, როგორც #61 ხაზზე, ასევე #88-ზე და ა.შ. გვაინტერესებს განსხვავებულ რელიეფზე როგორ იმუშავებს, დავაკვირდებით ელექტროენერგიის ხარჯვის პროცესს. ეს არის პირველი შემთხვევა, რომ ქალაქში ელექტროავტობუსი გადის, რასაც მივესალმებით და ვფიქრობთ, რომ მომავალი ელექტრო ტრანსპორტისაა“, - განაცხადა ბეჟანიშვილმა.
თბილისის მერიის ინფორმაციით, „ფრეგობასი“ გერმანულ კომპანიასთან - EURABUS და ჩინურ კორპორაციასთან - ZTE Corporation ერთად, საქართველოში ელექტროავტობუსების ქარხნის გახსნას გეგმავს. ელექტროავტობუსის კონსტრუქცია ინოვაციური მეთოდითა და ალუმინის მცირე დეტალებითაა აწყობილი, რომელსაც შედუღება არ სჭირდება. ავტობუსი დაყოფილია სექციებად და მისი სიგრძე 8, 10 ან 12 მეტრია.
interpressnews.ge
No comments:
Post a Comment