საფრანგეთის დედაქალაქ პარიზში მიმდინარე გრანდ სლემზე, მედლებისთვის 4 ქართველი ძიუდოისტი იბრძოლებს. ოქროს მედლის მოპოვების შანსი ბექა ღვიანიაშვილს აქვს. ნუგზარ ტატალაშვილი, ვარლამ ლიპარტელიანი და გურამ თუშიშვილი კი ბრინჯაოსთვის გაირჯებიან.
ღვინიაშვილმა ფინალამდე ოთხივე მეტოქეს იპონით სძლია. ბექამ გზიდან აზერბაიჯანელ აბდულჰაგ რასულუ, სამხრეთკორეელი ჯაეიონგ ლეე, გერმანელი ედუარდ ტრიპელი და იაპონელი კენტა ნაგასავა ჩამოიცილა. გადამწყვეტ შერკინებაში ქართველი ძიუდოისტის პირისპირ კიდევ ერთი იაპონელი შოიჩირო მუკაი დადგება.
ტატალაშვილმა მეოთხედფინალში ჩეხ იარომირ მუსილთან იპონით წააგო. ნუგზარმა რეპეშაჟში ბულგარელ ივაილო ივანოვს დამატებით დროში იპონით სძლია, ბრინჯაოს მედლისთვის კი ქართველი ძiუდოისტი კანადელ ანტუან ვალუა-ფორტიეს დაუპირისპრიდება.
ლიპარტელიანმა საწყის წრეებში ამერიკელი ელ ეი სმითი და ბელარუსი დანიელ მუკეტე იპონზე დასცა, შემდეგ ამავე ილეთით ფრანგ სირილ მარესთან წააგო, რეპეშაჟში კი შვედი მარტინ პაჩეკს იპონითვე აჯობა და ბრინჯაოსთვის ხორვატ ზლატკო კუმრიჩს დაუპირისპირდება.
მძიმე წონაში თუშიშვილმა ბელარუსი ვლადისლაუ ციარპიცკი და ალჟირელი მოჰამედ ამინე ტაიები იპონებით დაამარცხა, ნახევარფინალში კი იაპონელ კოკორო კაგუერასთან წააგო. ბრინჯაოს მედლისთვის გურამი ბელარუს ალიაკსანდრ ვახავიაკს გაეჯიბრება.
ფინალური ბლოკი 20:00 საათზე განახლდება.
imedinews.ge
No comments:
Post a Comment