ფოთის მერიის მიერ ფოთის თეატრის შენობის ექსპერტიზისა და რეაბილიტაციის პროექტის შესადგენად გამოცხადებული ტენდერი ჩაიშალა. ტენდერში მონაწილეობა არავის მიუღია. ინფორმაციას სააგენტო "ინტერპრესნიუსი" ავრცელებს.
ფოთის მერიის ინფრასტრუქტურის სამსახურის უფროსის თემურ დუნდუას განმარტებით, ტენდერის ჩავარდნის მიზეზი შესაძლოა ის თანხა იყოს, რაც პროექტისთვის არის გათვალისწინებული - 30 000 ლარი.
"ინფრასტრუქტურის სამსახურმა ანალოგიური ტენდერები მოიძია და ჩაშლის მიზეზების კვლევა ჩაატარა. სავარაუდოდ, საქმე გვაქვს გამოყოფილი თანხისა და შესასრულებელი სამუშაოების შეუსაბამობასთან. მოგეხსენებათ, თეატრის შენობა რა სავალალო მდგომარეობაშია. იქ დიდი მოცულობის სამუშაოა ჩასატარებელი. დღეის მდგომარეობით ჩვენ ვმუშაობთ ტექნიკური დოკუმენტაციის დახვეწაზე და უახლოეს დღეებში ტენდერი ხელმეორედ გამოცხადდება“, - თქვა თემურ დუნდუამ.
ფოთის თეატრის დირექტორი თენგიზ ხუხია ფიქრობს, რომ მეორე ტენდერიც იმავე მიზეზით ჩავარდება. ის მიიჩნევს, რომ მერიას პროექტის შედგენაზე ხელშეკრულება პირდაპირი შესყიდვის გზით სამხარაულის ექსპერტიზის ბიუროსთან უნდა გაეფორმებინა.
ფოთის თეტრი 2014 წელს საზეიმო ვითარებაში გაიხსნა, თუმცა შენობა კვლავ ავარიულია. შენობაში ჭერის ნაწილი 6 თებერვალს ჩამოინგრა. ორი წლის წინ კი, ლიფტი ჩავარდა, რის შედეგადაც მემანქანე დაშავდა. ის ამ დრომდე მკურნალობს. შენობა 9 წლის განმავლობაში შენდებოდა, რისთვისაც ბიუჯეტიდან 11 მილიონ ლარზე მეტი დაიხარჯა.
imedinews.ge
No comments:
Post a Comment