საქართველოს მთავარმა პროკურორმა ირაკლი შოთაძემ საპროკურორო საბჭოს 2017 წლის მეორე ნახევარში პროკურატურის სისტემის განვითარებისკენ მიმართული სხვადასხვა ღონისძიებების შესახებ ანგარიში გააცნო.
მთავარმა პროკურორმა საპროკურორო საბჭოს წევრებს უწყების სტრატეგიულ მიმართულებებზე მიაწოდა ინფორმაცია, საქართველოს პროკურატურაში განხორციელებულ რეფორმებზე ისაუბრა და აღნიშნა, რომ უწყების ერთ-ერთ პრიორიტეტს პროკურორთა დამოუკიდებლობის უზრუნველყოფა და დაზარალებულთა ინტერესების დაცვა წარმოადგენს.
ანგარიშის მიხედვით, 2017 წელს 2016 წელთან შედარებით სისხლისსამართლებრივი დევნის დაწყების მაჩვენებელი 1,8%-ით არის შემცირებული - 2016 წელს სისხლისსამართლებრივი დევნა დაიწყო 16 085 პირის, ხოლო 2017 წელს - 15 789 პირის (სრულწლოვნები და არასრულწლოვნები) მიმართ.
2017 წელს სისხლის სამართლებრივი დევნა ყველაზე ხშირად დაიწყო ნარკოდანაშაულისა (2079) და ქურდობის (3389) ბრალდებით.
ამასთან, 2016 წელს დევნადაწყებულ პირთა 67.9%-ის მიმართ მოითხოვა პროკურატურამ აღკვეთის ღონისძიების შეფარდება, ხოლო 2017 წელს - 58%-ის მიმართ.
imedinews.ge
No comments:
Post a Comment