შიდსის ცენტრის ახალი შენობის ასაშენებლად სახელმწიფომ ტენდერი გამოაცხადა. ამის შესახებ 1tv წერს.
როგორც ჯანდაცვის სამინისტროში განაცხადეს, ს.ს. „ინფექციური პათოლოგიის, შიდსისა და კლინიკური იმუნოლოგიის სამეცნიერო-პრაქტიკული ცენტრის“ ფუნქციონირების უზრუნველსაყოფად შ.პ.ს „ავერსი ფარმას“ საკუთრებაში არსებული ყოფილი ინფექციური საავადმყოფოს ტერიტორიის იჯარის შესახებ გაფორმებულია სამმხრივი ხელშეკრულება ამ ცენტრს, შ.პ.ს „ავერსი ფარმასა“ და საქართველოს შრომის, ჯანმრთელობისა და სოციალური დაცვის სამინისტროს შორის.
საქართველოს მუნიციპალური განვითარების ფონდის მიერ, მთავრობის დადგენილების თანახმად, ქალაქ თბილისში, ლუბლიანას ქუჩაზე არსებულ მიწის ნაკვეთზე ინფექციური საავადმყოფოსთვის ახალი შენობის საპროექტო-სამშენებლო სამუშაოები მიმდინარეობს. პროექტის ღირებულება ერთ მილიონ ლარს შეადგენს. აღნიშნულისთვის 315.000 ლარი შრომის, ჯანმრთელობისა და სოციალური დაცვის სამინისტროს მიერ უკვე მიმართულია მუნიციპალური განვითარების ფონდისადმი.
სამინისტროს ცნობით, საპროექტო-სამშენებლო სამუშაოების შესყიდვის შესახებ მუნიციპალური განვითარების ფონდის მიერ გამოცხადებული ტენდერი 2018 წლის 14 თებერვალს დასრულდება.
ამავე წლის 17 იანვარს, ფონდში დაინტერესებული საპროექტო ორგანიზაციებისთვის ცენტრის ხელმძღვანელი პირების მონაწილეობით საინფორმაციო შეხვედრა და სატენდერო პირობების პრეზენტაცია გაიმართა. შეხვედრას 20-მდე, მათ შორის ორი უცხოური საპროექტო-სამშენებლო ორგანიზაციის წარმომადგენელი ესწრებოდა.
რაც შეეხება შიდსის ცენტრის წარმომადგენლებს, მათი განცხადებით, ჯერ ეს ტერიტორია ოფიციალურად გადაცემული არ აქვთ. თუმცა ეკონომიკის სამინისტრო ახალი საავადმყოფოს ასაშენებლად თავდაპირველად შეპირებული 7700 კვადრატული მეტრის ფართის ნაცვლად, დაწესებულების ფუქნციონირებისთვის და მშენებლობისთვის შეუსაბამო 5650 კვადრატულ მეტრს სთავაზობს, რაც ცენტრის წარმომადგენლების თქმით, ახალი საავადმყოფოს სართულების სიმაღლე და კოეფიციენტები მნიშვნელოვნად გაიზრდება.
ასევე, ამ მოცემულობთ მნიშვნელოვნად გაიზრდება ცენტრის ასაშენებლად ინფრასტრუქტურის სამინისტროსგან გამოყოფილი თანხის რაოდენობაც. ისინი ეკონომიკის სამინისტროს თავდაპირველად შეპირებული 7700 მეტრი ფართობის გადაცემას სთხოვენ. მათი განცხადებით, ამ ეტაპზე ჯანდაცვის, ეკონომიკისა და ინფრასტრუქტურის სამინისტროები ფართის დაზუსტებასა და განხილვაზე მუშაობენ.
შიდსის ცენტრის შენობა, სადაც ისინი ამ დრომდე არიან განთავსებული 2009 წელს გაიყიდა და ის კომპანია ,,ავერსი ფარმამ,, შეიძინა. მას შემდეგ, ცენტრის წარმომადგენლების თქმით, მძიმე მდგომარეობაში იმყოფებიან, არ აქვთ შეაბამისი ინფრასტრუქურა პაციენეტების სამკურნალოდ და შენობების რეაბილიტაციასაც ვერ ახდენენ, რადგან ის კერძო საკუთრებაში იმყოფება.
ახალი ცენტრის აშენების ან არსებული შენობების რეაბილიტაციის მოთხოვნით ცენტრის წარმომადგენლებმა გასული წლის ზაფხულში აქცია გამართეს და აქციაზე ახალი საავადმყოფოს აშენების შესახებ დაპირება უშუალოდ პრემიერ-მინისტრის გიორგი კვირიკაშვილისგან მიიღეს.
imedinews.ge
No comments:
Post a Comment