მაკედონია მზად არის, საბერძნეთთან დავის დასარეგულირებლად ქვეყნის სახელწოდებას გეოგრაფიული დაზუსტება დაამატოს.
სააგენტო Reuters-ის ცნობით, ამის შესახებ მაკედონიის პრემიერმინისტრმა ზორან ზაევმა განაცხადა. ზაევმა ასევე განაცხადა, რომ ალექსანდრე მაკედონელის სახელობის აეროპორტს სკოპიეს საერთაშორისო აეროპორტს დაარქმევენ, ამავე სახელწოდების ცენტრალურ ავტომაგისტრალს მეგობრობის მაგისტრალი ერქმევა.
„დღევანდელი გადაწყვეტილებით ჩვენ ვადასტურებთ ჩვენს ნაბიჯს საბერძნეთთან მეგობრობისა და ნდობის გზაზე“, – განაცხადა მაკედონიის პრემიერმინისტრმა.
ქვეყნის ახალ სახელწოდებად რამდენიმე ვარიანტი განიხილება, მათ შორის ჩრდილოეთ მაკედონია, ახალი მაკედონია და ზემო მაკედონია.
მაკედონიის სახელწოდების შესახებ კამათი 1991 წელს იუგოსლავიიდან დამოუკიდებლობის მოპოვების შემდეგ დაიწყო. ახლა, როცა მაკედონია ნატოსა და ევროკავშირში გაწევრიანებას აპირებს, მისი სახელწოდება კიდევ უფრო აქტუალური გახდა. საბერძნეთის ხელისუფლება შიშობს, რომ ამ სახელწოდებამ შესაძლოა ჩრდილოეთ საბერძნეთის პროვინცია მაკედონიასთან დაკავშირებით სირთულეები შექმნას.
imedinews.ge
No comments:
Post a Comment