კომპოზიტორ გია ყანჩელს ქალაქის 70 წლის იუბილესთან დაკავშირებით გამართულ ღონისძიებაზე საპატიო რუსთაველის სპეციალური სიგელი და საჩუქარი გადასცეს.
კომპოზიტორს სიგელი რუსთავის მერმა ირაკლი ტაბაღუამ გადასცა.
გიგა ლორთქიფანიძის სახელობის რუსთავის პროფესიულ-დრამატული თეატრში დღეს ნიკოლოზ რაჭველისა და საქართველოს სიმფონიური ორკესტრის კონცერტი მიმდინარეობდა.
კონცერტში მონაწილეობდა მომღერალი ნატო მეტონიძე, რომელმაც გია ყანჩელის ორი ნაწარმოები შეასრულა.
,,მე არ ვიცოდი, რომ საპატიო რუსთაველის წოდებას მომანიჭებდნენ. მე გახლავართ რუსთაველის პრემიის ლაურიატი, რომელიც მომანიჭეს რობერტ სტურუას სპექტაკლ „რიჩარდ მესამესთვის“ დაწერილი მუსიკისთვის. დღეს კიდევ მომანიჭეს ქალაქ რუსთავის საპატიო მოქალაქის წოდება და ძალიან მოხარული ვარ. კონცერტის ბოლოს გამოვედი ჩემი სურვილით, მე იმედი მაქვს, რომ ეს სურვილი შესრულდება. სურვილი გამოიხატება შემდეგში, რომ ჩვენი სახელმწიფო სიმფონიური ჩამოვიდეს რუსთავში და რუსთავის საზოგადოებას მისცეს საშუალება მოისმინონ ან ბახის ან ბეთხოვენის ან მოცარტის ნაწარმოებები, ხანდახან ქართველი კომპოზიტორების მუსიკა. იმედი მაქვს, რომ ეს მოხდება“, - განაცხადა კომპოზიტორმა გია ყანჩელმა.
„რუსათავქალაქობა 2018“ 15 სექტემბერს გაიხსნა. საზეიმო ღონისძიებები მთელი კვირის განმავლობაში გაგრძელდება. დღეს ქალაქის დღესასწაულს 16.00. საათიდან თოდრიას სახელობის ქუჩა, ,“ფერების ფესტივალით“, ელექტრონული მუსიკით და უამრავი სიურპრიზით უმასპინძლებს.
imedinews.ge
No comments:
Post a Comment