წყლის ტარიფის ცვლილება ბინის გამქირავებლებს, ანუ იმ ადამიანებს, რომლებიც სრულად აქირავებენ ბინას სხვადასხვა მიზნებით, არ შეეხებათ. წყლის ტარიფის ცვლილება ვრცელდება საოჯახო ტიპის სასტუმროებზე, - ამის შესახებ სემეკის კომისიის წევრმა გიორგი ფანგანმა დღეს, საოჯახო ტიპის სასტუმროების სასმელი წყლის ტარიფთან დაკავშირებით გამართული პირველი სამუშაო შეხვედრის შემდეგ განაცხადა. ინფორმაციას „ინტერპრესნიუსი“ ავრცელებს.
👉 კვალიფიციური მომზადება - ყველა საგანი ერთ სივრცეში
ფანგანის განმარტებით, არსებული კანონმდებლობა არ იძლეოდა მკაფიო პასუხებს საყოფაცხოვრებო და არასაყოფაცხოვრებო ტარიფის დარიცხვასთან დაკავშირებით. სწორედ ამან განაპირობა გასულ წელს GWP-ის მიერ საოჯახო ტიპის სასტუმროებისთვის წყლის არასაყოფაცხოვრებო ტარიფის დარიცხვა.
.
„საკითხის შესწავლის შემდეგ ჩავთვალეთ, რომ არსებული მიდგომა არ იქნებოდა სწორი. რადგან ადგილი აქვს შერეული ტიპის მოხმარებას, შევიმუშავეთ ჰიბრიდული ტარიფი. როგორც ვნახეთ, საყოფაცხოვრებო მომხმარებლების მიერ წყლის მოხმარება თვეში საშუალოდ არის 15-16 მ3. 20 მ3-მდე განვსაზღვრეთ ზედა ზღვარი. 20 მ3 -ის ფარგლებში ყველა საოჯახო სასტუმრო გადაიხდის საყოფაცხოვრებო ტარიფით, ხოლო ამ ზღვრის ზემოთ არასაყოფაცხოვრებო ტარიფით, ანუ პირობითად, თუ წყლის მოხმარება თვეში 25 მ3 -ია, აქედან 20 მ3 -ის ღირებულებას გადაიხდის საყოფაცხოვრებო ტარიფით, დანარჩენ 5 მ3 -ს კი არასაყოფაცხოვრებო ტარიფით“,- განაცხადა გიორგი ფანგანმა.
მისივე თქმით, სემეკი გააგრძელებს საკითხის სამუშაო რეჟიმში განხილვას და შესაძლოა სემეკის მიერ დადგენილი ნიშნული შეიცვალოს.
მოქალაქეებმა, რომლებიც თბილისში საცხოვრებელ ფართს დღიურად აქირავებენ, წყლის მომწოდებელ კომპანიას GWP-ს მარეგულირებელ კომისიაში ოქტომბრის ბოლოს უჩივლეს. მიზეზი წყლის გადასახადის საყოფაცხოვრებოს ნაცვლად კომერციული ტარიფით დარიცხვა და დაკისრებული ჯარიმები იყო.
imedinews.ge
No comments:
Post a Comment